Ósasvæðið geymir oft töluvert af bleikju og er einkum gjöfulegt í kringum fallanda. Það er aðalega veitt alveg við útfallið af ánni og hafa veiðimenn gert góða bleikjuveiði en þá helst á fyrri hluta tímabilsins.

Mjög fallegur og djúpur hylur sem er oft fyrsta stop hjá laxi í göngu. Af einhverjum ástæðum heldur þessi hylur lítið af fiski og virðist sem hann fari beint upp í Tjarnarhyl eða Fosskvörn og er lítið að bíða eftir veiðimönnum.

Tjarnarhylur breytist mikið á milli ára og hefur sem gott sem horfið. Hann hefur helst að geyma lax í miklu vatni en seinustu ár hefur mikið af möl safnast fyrir í hylnum en það er alltaf gott að stoppa hérna og taka nokkur köst ef ske kynni að laxinn stoppi þarna. Þessi staður gefur einni helst lax þegar hann er að ganga.

Fyrsti veiðistaður sem getur haldið laxi. Hylurinn er djúpur og stór og með hægu rennsli og því þarf oft að hreyfa fluguna þegar staðurinn er veiddur. Áður fyrr var hérna foss þar sem berggangur liggur þvert yfir efri hluta staðarins.

Hérna er oft gott að byrja smátt og taka nokkur rennsli. Mælt er með því að klára hylinn með því að hraðstrippa Sun Ray túpu þvert yfir hylinn og oft kemur laxinn í loftköstum á eftir flugunni. Passa skal að fara ekki oft nálægt brúninni því áin er mjög tær og verður fiskur auðveldlega var við veiðimenn ef þeir fara ekki varlega.

Staður sem geymir sjaldan fisk og hafa veiðimenn oftar ekki ekki sleppt því að veiða hann. Allt í lagi að stoppa og skoða en drífa sig síðan áfram uppeftir.

Strengir og litlir hylir sem breytast á hverju ári og heldur einna helst fisk í göngu. Þessir staður breytist mjög mikið á milli ára en oft liggur göngulax í litlum holum á þessu svæði. Best væri að veiða þetta svæði hratt og gott er að nota Hitch eða Sun Ray.

Staður sem er gífurlega fallegur og stór. Breytist mikið á þessu svæði og þarf því að kanna aðstæður vel á hverju ári en áin rennur um tvær lænur í hylinn og er misjafn hvor strengurinn er vatnsmeiri. Þarna eru gamlir brúarstólpar en lax liggur oftast við og getur hann legið alveg niður á brot. Því miður hefur lítið af laxi stoppað þarna seinustu ár en þessi staður var hér áður fyrr einn öflugasti staðurinn í ánni. Vonandi fer hann að tikka inn fljótlega!

Staður sem menn ættu alltaf að prófa en getur verið erfiður að veiða með flugu vegna þess hve straumur er misjafn í hylnum. Hylurinn er undir háum kletti og geymir alltaf lax, ef hann er á annað borð mættur á svæðið. Það er nánast ómögulegt að sjá laxinn og getur hann legið um allt svæðið en helsti tökurstaðurinn hefur verið neðarlega á breiðunni og ættu menn alltaf að veiða alveg niður á brot… og jafnvel lengra.

Einn af fallegri veiðistöðum í ánni og er undir háu líparítbjargi þar mikið af fýl verpir.  Staður sem gefur alltaf fisk á hverju sumri og hafa veiðimenn lent í skemmtilegri veiði þarna á haustinn en undir kvöld á laxinn til að fara á hreyfingu og leggjast í þennan streng.

Staður sem gefur ekki marga fiska á hverju ári en fiskur getur hopað í strenginn ef það er mikið vatn í ánni.  Ef laxi er í strengnum tekur hann yfirleitt mjög ofarlega.

Einn aðal veiðistaðurinn seinustu ár og skemmtilegur fluguveiðistaður.  Lax getur legið um allan hyl en hefur þó einna helst bunkast neðarlega í hylnum rétt þar sem bjargið að sunnanverðu byrjar að halla niður.  Þetta er staður sem menn ætti að byrja að veiða með litlum flugum og yfirleitt er óþarfi að fara í túpur þar sem menn vilja alltaf koma aftur og aftur og reyna við laxinn á þessum stað.

Rétt fyrir ofan Neðraskjól er Efraskjól.  Mjög fallegur hylur og mjög auðvelt að koma auga á lax í þessum hyl ef hann er á annað borð mættur.  Ekki eins drjúgur og Neðraskjól en hérna ættu menn alltaf að byrja og veiða sig niður.

Annar mjög öflugur veiðistaður sem er einn skemmtilegast fluguveiðistaðurinn í ánni.  Langur hylur með góðum straum sem er staðsettur undir háu bjargi.  Í hylnum eru margir tökustaðir og ættu menn að veiða þennan stað vestan frá enda ekki hægt að veiða hann að austanverðu.  Ekki skyggna hylinn áður en hann er veiddur því laxinn kemur auðveldlega auga á menn ef þeir fara of nálægt brúninni.  Þarna er nánast hægt að ganga að laxi vísum en aðaltökustaðurinn er rétt um miðjan hyl.  Ef lítið vatn er í ánni leggst laxinn við stóran stein sem er ofarlega í hylnum.

Ef mikið vatn er í ánni getur þessi staður haldið fisk, annars er gott að sleppa honum.  Gefur einna helst í miklu vatni og ef lax er að ganga.

Eins og með allar ár þá borgar sig að veiða á milli staða en veiðimaður sem var við veiðar fyrir nokkrum árum prófaði að veiða þennan stað og fékk fínan afla.  Eftir það hefur þetta verið merktur veiðistaður og hefur alla tíð gefið ágætis veiði.  Veiðimenn eru hvattir til þess að byrja að veiða ofarlega í hylnum því laxinn getur legið alveg upp við grynningar eða þar sem rennur í hylinn.

Hérna er auðvelt að koma auga á lax ef menn eru slungnir. Laxinn er hérna í sínu besta camo-umhverfi og fellur algerlega inn í landslagið. Staður sem geymir oft töluvert af laxi. Best er að standa á eyrinni að vestanverðu og þverkasta yfir hylinn. Fiskurinn er oft mjög nálægt bakkanum og því er best að vaða sem minnst á þessum stað.

Einn skemmtilegasti veiðistaðurinn í ánni og geymir alltaf fisk.  Ekki er mögulegt að sjá laxinn á þessum stað en ef hann er mættu, þá er hann hérna.  Þennan stað þarf alltaf að veiða og heldur laxinn sig út um allt í strengnum í litlum holum sem sjást illa vegna straums.  Best er að veiða þennan stað að austanverðu en hægt er að veiða hann beggja megin við ána.

Í neðri hluta Skógarmannagljúfurs er staður sem lætur lítið fyrir sér og kallast Hellan.  Þarna er heljarstór steinn er staðsettur í mynni gljúfursins en einmitt við hann safnast mikið af laxi.  Þetta er erfiður flugustaður en þó hafa menn lent í ævintýrum á þessum stað enda safnast hér fyrir töluvert af laxi má því búast við að það sé lax hérna allt tímabilið.  Hægt er að veiða staðinn bæði með því að standa ofan á hellunni og kasta upp í gljúfrið og láta fluguna renna undir steininn en laxinn bunkast of undir steininum og því erfitt að koma auga á hann.  Einnig hafa menn notað gárutúpur en þá er betra að standa fyrir ofan steininn og láta fluguna skauta fyrir framan steininn.

Mjög erfiður fluguveiðistaður og nánast ómögulegt að landa fiski hérna.  Þessi staður hefur því oft verið ákveðinn griðastaður fyrir laxinn og menn hvattir að spá vel í hvernig þeir vilja landa fiski sem sett er í á þessum stað.  Auðvelt er að koma auga á fiskinn á þessum stað en nánast ómögulegt að landa honum.